Kjendisnytt

I dag har vi køyrd til Vågstranda, denne vakre stad, men det eg vil fortelje om er det vi gjorde i går. Då var vi nemleg i Oslo ein tur. Primært for å møte Tone og Runar og sjå Max Manus saman med dei. Det var veldig hyggeleg, og filmen var god. Filmen bør faktisk sjåast av dei fleste av dykk. Historia om andre verdskrig bør nemleg ikkje gløymast. Det var dagens peikefinger.
Eg og Steffen kjøpte oss middag ute før filmen, og etter anbefalingar frå svigermor si venninne endte vi opp på Brasseri45. Der meska vi oss med andelår og villsvin, sjokolademousse med bringebærsaus og forskjelleg anna godt til ein ikkje så alt for dyr penge. Vi sender herved anbefalinga vidare!
Men altå: For å komme oss til Oslo tok vi denne gongen buss frå Hønefoss. Ingen av oss likar å køyre i hovudstaden, og endå mindre å parkere der - altså tok vi buss. Eg blir alltid litt uggen og uvel når eg tek buss, og vi spaserte difor litt rundt omkring før vi ville ha mat. Vi var såvidt innom Nobels fredprissenter, og gjekk så vidare bortover Aker brygge. Midt i ein gjesp vend mot mi høgre side møter eg blikket til blomster-Finn! Han fekk altså sjå meg frå mi mest flatterande side - innsida. Når det er sagt så såg han ikkje ut til å vere i kjempehumør han heller.