På tide!

Ja så ser det ut til at vi endeleg får Tresfjordbrua og Vågetunnellen! Eg har skrive om denne vegstrekninga tidlegare, men gjentek gjerne: Med eitt tapt menneskeliv per år i snitt dei siste tredve åra seier det seg eigentleg sjølv at noko drastisk må gjerast. I dag vart innhaldet i Nasjonal Transportplan presentert, og jammen ser det ut til at vi kan gle oss til ny veg om allereie fire år! :)

Det overraskar meg litt at fleire kommentarar i nettutgåvene til lokalavisene er negative. Ja, det er eit skår i gleda at både bru og tunnel skal verte finansiert av bompengar. Eg skjønnar at det kan gjere eit innhogg i økonomien til pendlarar til dømes. Andre er bekymra for dyrelivet i fjorden, og for utsikta i Tresfjorden... Nokon er redd dei inneklemte bygdene blir skadelidande. Joda, eg ser alt dette, men alternativet er jo så ufatteleg mykje verre!

Eg pustar iallfall letta ut over at min familie, slekta mi og vener og kjente snart kan køyre på ei tryggare og meir miljøvenleg vegstrekning. Så tusen hjarteleg takk til lokale heltar som har kjempa og stått på for dette over fleire år!